** وسط الخطايا والذنوب ** // بقلم الشاعر / محمد سالم // مجلة ~ فيتارة القلم الذهبي

وتفوت عليك كل الغيوم وتنام تقوم تلقاك عدم
مش فارق الليل الطويل ولا فارق الخوف م الندم
زمنك وداير يشتهى إنك تكون زى الجدار اللى إتهدم
عايش حصار دايق مرار صوتك من القهر إنكتم

شايف قلوب متحسرة وحكاوى بيك متبعترة
وتطوف عنيك وسط الدروب تلقى الحيطان متكسرة
من شدة الغدر العنيد داب الحديد والبيبان متحسرة
وتدور تدور ع الأمان قلب الزمان تلقى السيوف متحضرة
نفس المشاعر والأماكن والظروف وخطوط كتير متدمرة
دايرة التروس وعلى النفوس أشرار تدوس والطيبه ليك متنكرة
وسط الخطايا والذنوب وسط أوتار العيوب تظهر خيوط المشكلة
عايشين مع الليل الطويل وسط العلل ويا الملل لابسين تياب المهزلة
محمد سالم