** (( عمرك حسيت حد مراقب حركاتك )) ** /// بقلم / نهاد_شاهين‬ /// مجلة ~ فيتارة القلم الذهبي

عمرك حسيت حد مراقب حركاتك
بيعد انفاسك واهاتك
بيحبك وبيكره قربك
وبيبعد عشان محتاجلك
بيحب انك تبقى عشانه
ويعاند حبه بأحزانه

طب شوفت ف يوم عاشق ولهان
بيحارب اصل عشان اوهام
محتار ف الوصف وف الالحان
عاشق معشوق بين انس وجان
نظره شوق بين القضبان
قضبان الحد الممنوع
ودا الشئ اللى ملوهشي رجوع
نقطه زيت فوق المايه
وبترقص ع وشها عايمه
متناقض لكن بخياله
عاش الممنوع ف زمن خانه
لا هو عارف يتحول مايه
ولا يرجع ع الشط مكانه
واذا حاول يرجع من تانى
انساه يا زمان اصبح جانى
واذا كان له نصيب ف الذكرى
همحيه وارجع تانى لبكره
واعيش اليوم اخلق فكره
عن حب اتحرم ف كيانى
واضحك وكأنى واحد تانى
واخلق لى حلم يقوينى
وياخدنى بعيد برا سنينى
واكون انسان غير ال مذكور
واسجن اوجاعى جوا سطور ‫#‏نهاد_شاهين‬