عين في الجنة وعين في النار.........الشاعر المبدع .......عبد الرحمن فتحي الحناوي

((   عين في الجنة وعين في النار   )) 

النوع / الشعر العامي 

التاريخ //الخميس  7 / 6 / 2017 .

تأليف أ / عبد الرحمن فتحي الحناوي .

البلد / مصر .

🎯🎯🎯🎯🎯🎯🎯🎯🎯🎯🎯🎯🎯

فكر واتمهل واتأني قبل ما تاخد قرار *

دا كلمة تدخلك الجنة وكلمة توديك النار *

كل الأمور مش واضحة أبدا وضوح النهار *

كل ألعوبة ومكيدة بتتجهز من خلف ستار * 

والحقيقة ممكن تتوه وتختفي ويا الأسرار * 

وتلاقي نفسك ندمان لو القرار فيه انهيار *

السياسة دي يا صاحبي معجونة بمية مرار *

التصريح تلقاه وعكسه والعدو ما بقاش غدار * 

وممكن تلقي نفسك مرة قائد عظيم مغوار *

وتاني يوم تتكرم وبعد بكرة زعيم أشرار *

النهاردة انتا معايا وبكرة أصب عليك النار * 

قرار بيطلع في يوم ويتكذب آخر النهار *

لو صاحبك قام م النوم وقالوا له ازرع خيار *

بعد ساعة يقولوا له مش هوا دا نوع الخيار *

دا خيارنا استراتيجي وخيارك شايل دمار *

عندك نووي مخبيه وشايله ف قلب الجدار *

يلا بينا نربيه ونعلمه يطيع الكبار 

🎯🎯🎯🎯🎯🎯🎯🎯🎯🎯🎯🎯

يا سياسة الرحمة بينا . دوختينا مع الأخبار * 

امتي بس أشوفك من غير حبيب ولا جار *

ساعتها بس أبوسك واتحالف مع الأخيار *

ونحس بحلاوة العيشة ونهتف مع الأحرار *

لكن دا حلم بعيد علينا كل دماغ لها أفكار *

حتي الحلم كتير علينا ربنا يجازي الفشار *

يا سياسة يا بنت سيوسة سيبناكي للجبار *

أخدتي لبن الجاموسة وسيبتي لنا لبن الحمار *

دا البعد عنك غنيمة والقرب منك نار *

طلقتك بالتلاتة وراح اسكن في قلب الغار *

لا حاسمع كلمة شماتة ولا سييء الأخبار * 

تفتكروا دي كياسة ولا شطحات أفكار 

ولا أنا لخبطتكم ومش طالع علينا نهار *

بجد بجد السياسة تخلي الحليم ينهار *

تعمل لك م البحر طحينة وتخليك دايما محتار *

خد لك طبق سياسة بالشطة والبهار * 

كل واملا بطنك وسيبك من السيجار *

أنا خايف لما تتناقشوا يحصل بينكم شجار *

من ساعة كنتم حبايب واصحاب جوه الدار * 

ليه السياسة خلت وجوهكم تنطق شرار *

🎯🎯🎯🎯🎯🎯🎯🎯🎯🎯🎯🎯

الطف بينا وارحمنا يا عالم الأسرار * 

وخفف علينا همومنا واجعل قلوبنا عمار *

وابعد عنا السياسة وعكارة الأخبار *

ناكل ونشرب ونحكي ونعيش كده أحرار *

ونعيش عيشة هنية ونتعامل مع التجار * 

ولا نوجع دماغنا بجرايد ولا نشرة الأخبار *

ولا داعش ولا مدعوش ولا أحداث انفجار * 

أخبار تجيب الضغط  وأخبار فيها انكسار *

وأخبار تلخبط دماغك وصريخ وكتر سعار *

وصحفي يبيع القضية وبيقبض بالدولار 

ومذيعة تجيب لك بهية تهتف مع الثوار *

ومع كل حزب شوية جاية تولعها نار *

وتلف علي كل قناة وتفبرك الأخبار *

وشاب ماسك حبل قال إيه ناوي انتحار *

يا سياسة زهقنا منك غيرتي ليه المسار *

حنخسر يعني إيه لو اشتغلنا بره الإطار  

وسيبنا السياسة وأهلها ممنوع الانتظار *

الدنيا زي بالونة يفرقعها أصغر مسمار 

والسياسة انتكاسة جدها يساوى الهزار 

السياسة انعكاسة عين في الجنة وعين في النار *

( جميع الحقوق محفوظة للمؤلف 

🎯🎯🎯🎯🎯🎯🎯🎯🎯🎯🎯🎯