كحيان أفندي
لا سندباد أنا في الحواديت
ولا طرزان راكب الخرتيت
ولا حتى كمان سبايدر مان
ولا انا في صباعي خاتم سليمان
أنا كحيان أفندي
وشقيان جدا
أصحى أنا قبل الديك مابيدن
أصلي الفجر بصفو النية
وأحط البراد ع البوتجاز
والأنبوبة تعاند فيا
يرد عليها وابور الجاز
جرى إيه ياأنبوبة إنتي يامعيوبة
ليه بتعاندي ف صاحبي وفيا
هات برادك يلا ياصاحبي
بعود كبريت كده ولع فيا
يامحلى العيشة مع المجانين
يوماتي العركة دي ع الصبحية
غيري بيشرب شاي ياسمين
والبيتي فور لجل التحلية
وأشرب شاي أنا بالكيروسين
ألقى الشاي دغششلي عنيا
أروح الشغل أنا ماشي على رجلي
رياضة وشكلها هتجيب أجلي
وأقضي اليوم أطفح في الكوتة
بعيش حدوتة مافيها توتة توتة
ولما بيجي ميعادي أروّح
أمشي ولا السكران أتطوّح
أول ماأوصل عتبة بيتي
ألقى غراب البين بينوح
فين الأجرة بتاعت الحجرة
إللي إنت ساكنها
حجرة إيه ياسعادة البيه
أنا ساكن جحر
مهياش فيلا في قلب مارينا
وشايفة البحر
دي حتة عشة وقبلي سكنها
فراخ معاليك
أصبر حبة لأخر الشهر
يارب تموت الله يخليك
طيب ماشي ياكحيان أفندي
أخر الشهر ألقى فلوسي عندي
طيب حاضر ماشي يابيه
يابو صوت كروان ماشاء الله عليه
وف آخر الرحلة أنا بوصل أوضتي
على راسي شايل طاجن ستي
وعلشان يكمل لحن سعادتي
لازم أجوع زي ماجاع غاندي
آدي حياتي وآدي ماعندي
مهواش فيلم خيالي أو هندي
غمضوا عينكو وفكروا حبة
ماذا لو كنتم كحيان أفندي
بقلم طارق السيد
ليست هناك تعليقات:
إرسال تعليق