** .. الصدق يستاهل .. // بقلم الشاعر / مدحت عطية // مجلة ~ فيتارة القلم الذهبي

الصدق يستاهل
للشاعر/ مدحت عطية

لو نامت كلمة
بين كلامك
مش حقيقه
إشطب

قول
إرسم الـ شايفه
إكتب
وإرمى القلم
لو هتكدب
خليك صادق
شجاع
ماتكونش يوم
زى الـ .. باع
إملا صوتك
بالصدق
ما تواربش
الـ وارب قابلك
ضاع
ما تقولش شبعان
على الـ جاع
ما تخليش الحق
يجروا وراه .. بالدراع
إمسك بإيدك
فى الحق .. تلقاه
ما تقولش كلمه
جاحدة
تكبر فى ودن
الولاد
الفرصه الوحيده
للصدق .. الحياه
هتعيش مره واحده
الحياه مش .. بتتعاد
كلمتك الواضحه
سلاح
تخلق راحه
وسلام
كفايه أن جواك
مرتاح
كفايه إنك
هتنام
بالصدق
هتشوف الحديد
شفاف
فى البرد
هتحس بدفى
وعمرك ما هتحتاج
للحاف
ادخل بصدرك
فى الحياه
إوعى تجبن
أو تخاف
عرى فعلك
وقولك .. إنشا الله
تاكل
لقمه .. حاف