** عينى على صبيه ** // بقلم الشاعر / عـــــادل الشــــــــهـــابى // مجلة ~ فيتارة القلم الذهبي

****** عينى على صبيه ******
عينى على صبيه ....
عنيها جميله وبهيه ...
وبيها تحلى الأغنيه ...
وألحانها كلها وطنيه ...
أرضها خصبه للحب والحنان ...
وقلبها يساع كل الجيران ..
وسمعتها مشرفه كل المكان ...
جمالها ده جمال ربانى ...
تبعد عنها ترجعلها من تانى ...
وأسمها من أحلى الأسامى ..
نيلها ميته سكر ...
وجوها بالورد معطر ..
تحبها من غير ما تفكر ...
هى اللى بتمناها ...
وحياتى أقدمها فداها ...
عايشه فيا وعايش جواها ...
هى اللى قالوا عليها أم الدنيا ...
غلاوتها والله حاجه تانيه ...
مقدرش أزعلها لو لثانيه ...
بحبها وطلبت أديها ...
وحياتى مش كتير عليها ....
دى يكفينى نظره من عنيها ...
هى اللى عايشه فى وجدانى ...
من غيرها بحس أنى وحدانى ...
هى اللى مالكه الفؤاد ...
وهى ورث الأجداد ....
وأصل كمان الاولاد ...
سمارى أيوه من سمارها ....
وبتباها أنا بجمالها ...
عينى عليكى يا صبيه ...
يا أم طرحه معطره وجلبيه ....
بقلـــــــم: عـــــادل الشــــــــهـــابى