ذرات عاشقة ........... ﻟﻠﺸﺎﻋﺮﺓ أسماء أبو علي محمد .............. مجلة ~ قيثارة القلم الذهبى ~

هو انت ليه كنت الأمل
وبقيت سراب
وانا كنت ليه بحلم اكون
ذرة تراب
يا حلم كان غالي المنال
يا حب اروع م الخيال
يا قصة من عشق وغرام
يا دنيا من حب وسلام
ياروح وطايرة ف السما
يا نجمة في حضن الهوا
يا قلب مخلص للحبيب
مالك قريب
عدى عليك عمر وزمن
وبقيت غريب
نفسي اعذرك
نفسي افتح لك عنيك
والمس ايديك
وامسح بايدي دمعتك
واحضن بعيني نظرتك
يا قلب اصله كان ملاك
يا عمر كان لحظة ف سماك
ياحب عدى م الحدود
سكنت انا بين الرمال
وعشت ف دنيا الخيال
باستنى لحظة ف دنيتي
يوم اللقا
يوم الحياة
يوم ماعترف ان الأماني
كلها
متجمعة ف نظرة عنيك
وباعترف
ان الحياة من غير لقاك
مالهاش وجود الا ف ايديك
يا حب امتى هتتفهم
وتقول انا حاسة بايه
ده كل نظرة مني ليه
بحس فيها بالحياة رغم
اني نايمة في التراب
وبحس برضه بخطوتك
ولسه فاكرة طلتك
بستنى لحظة من لقاك
اعود واعيش تاني ف سماك
احس لحظة من حنان
حتى ولو كانت بكا
هتكون بداية للأمان
من فوق هناك
هاكون ملاك
واتده عليك
وايكي واقول
يا عمر عود
مشتاقة اشوف نقطة مطر
تروي حياة العطشانين
تفضل هنا وتروح هناك
تسقي حبيبة ف التراب
تسمعها بتنادي عليك
مشتاقة لمسة من ايديك
او حتى دمعة من عنيك
تمسحها ليك
تترجى فيك
تعيش حياتك من جديد
تكون سعيد
تنسى الألم
كمل طريقك ف الحياة
وانسى اللي فات
بس افتكر كل الرفات
وافتكر مين كان شاريك
واني ضحية حبي ليك
حتى قلبي
عمره ما هان عليك
وبقيت اتا وسط التراب
وروحي طايرة ف السحاب
بس الغريبة اني بكون
عندي أمل ألقاك ف يوم
بين الغيوم
ذرات ولسه بتعشقك
وسط التراب
وسط الغيوم