مجلة ~ قيثارة القلم الذهبى ~

قصيدة/ هي كلمة...الشاعرالقدير/ محمود جنيدي. ..المحررة ياسمينةالكاشف/ تحياتي.

((**(( هى كلمــــــة ))**))
 ************************
   يقولها / محمود جنـيدى
 *********************

لو حبيت تقول كلمة ..
يبقى اختار الودن اللى حتسمع ،
قبل ماتختار الكلمة ..
وخلى اللى ف قلبك يبقى على لسانك ..
واوعى تزوّق أبدا كلمة ..
قولها زى ماانت حاسسها ،
وهى فى الآخر : كلمة ..
فإن طلعت الكلمة غلط ،
مش عيب انك تعتذر ..
والإعتذار برضه كلمة ..
بس خد بالك ..
لو اللى بيسمعك فى فلبه حب ،
حيسمعك بحب وحيعدّى الكلمة ..
لكن لو ضميره كده والاّ كده ،
أجارك الله .!.
الكلمة حتبقى مليووون كلمة .!.
لكن ..
إوعى تنسى إن الحب كلمة ..
والكره ، برضه كلمة ..
والحياة كلمة ..
والموت ، برضه كلمه ..
وربنا لمّا خلق الكون ،
خلقه بكلمة " كن " ..
يعنى برضه كلمة ..
لكن أكيد فيه كلمة بتختلف عن كلمة ..
فخد بالك قوى قوى ..
لأن سيرتك من بعدك : كلمة .!!.
*****************
فى 2017/10/25