** .. القاضي .. ** // بقلم / حسن البرارحي // مجلة ~ فيتارة القلم الذهبي

القاضي

ياسيدي القاضي
قرا لمحضر باش تفهم
خد وقتك لاتسرع ف لحكم
هدا شرفوه لقبيلة داروه حاكم
ف سربة الخيل كان مقدم
ياسيدي القاضي
هاد بنادم طلع ظالم
باع ارض لقبيلة شرى بكر وغنم
دار لاباس جمع الدرهم
باع البركي شرى لدهم
عيش لقبيلة ف الهم
جاع الدوار لسق الجلد ع لعظم
شي ضربو الزهايمر
شي صابو فقر الدم
قلب لحجر ما خمم ماحشم
حلاوة اللسان ف اعراض يتكلم
ما يحترم لا خال لا عم
ع الشر محزم
ياسيدي القاضي
سلم ارض لقبيلة ع لوراق ختم
باع ديور وسوق
سرق فلوس لقبيلة من الصندوق
فضحناه دارنا ليه بوق
ف الارض ولفلوس حنا حق
هو جوج حقوق
ياسيدي القاضي
اعطيناه المال والجاه
سلمنا ليه البير يسقي من ماه
حاكم لقبيلة شرفناه
حب الدنيا غواه
مسخوط مو مع اباه
ياسيدي القاضي
حتى واحد مابغاه
قطعنا السلام معاه
هجرنا الجامع
لفقيه الطالب معاه
يقيم الصلا يصلي وراه
جوعنا الشكوئ به الله......................................................

زجال الغرب
حسن البرارحي
سيدي يحي الغرب
ملاحظة هده قصة واقعية لاحدى الجماعات السلالية بجهة الغرب
الشراردة بني احسن..................................................