مجلة ~ قيثارة القلم الذهبى ~

باعوا منك غنوتين/ بقلم..الشاعرالقدير/ كريم زيدان...المحررةياسمينةالكاشف/تحياتي.

باعوا مِـنِّكْ غنوتين
موال بُكاهُمْ
بحّ صوتي......

  ولو فيها موتي....

ياللي دمـّك فرّقوه
بالـرخيص.....
وسرقوا قوتي

وانتي صابرة
وَنـا صابر

أيوب زايدو علية
بيــّعوة حتي الضفاير

أمـّا والـْدي عصـّبوة
إنـّة يعيش ....
من فوق كفيف

علشان رغيف

والضهر يرسم منحني

هيَّ الحقيقة منتـّنـْـة
زنازنها خــــوف

مراودها كحل ف مكحلة
متحنية بدوسة قدم
فتح البكارة .....

ويــّا تصقيف
الكـفـــوف

وانتي مليانة رفوف
وحبــّلوكـي بالدفوف

وزوّدونا في البطاقة
فروق بياخة

ياحبيبتي.....
 دي وساخة

لمّـا يرفضني الطريق.
ونـَا المسافر ...
في وريدك بالوكالـة

لمّـا أشحت لُقمتي
ونـا ابن بـطنك

وأشوف أخويـا
تحت رجليكي يحـنّي
طرْف توبك ويّا كعبك

لأجل اِنِّـكْ تجمـدي
او تحمدي.....
 في الحلق صوتي

وانتي ساكتة
في سكوتي

لمّـا هوّا يوطّي عـالـه

يلم زاده من
صناديق الزبالة

عيب عليكي
بلاش،سفالـة

ابن بطنك مش حثالـة

عيب عليكي
 كنتِ ماسـكه سرّتي
من فوق بحبلك
سنين عجاف

ونا مش مسيح
ولا انتي مريم

ورغم سجني
في عيونك
وجلادينك
والكفاف

والعصا والظلم
 لكن.....    
أقول بحبك

بالباقي منّي
للثـُمالـة

أو حتي خــوف

أمّا والْدي عصّبوه
انّة يعيش من فوق
كفيف ....
علشان رغيف
............
............
الشاعر كريم زيدان