مجلة ~ قيثارة القلم الذهبى ~

قصيدة/ لسة بحبك زي زمان...الشاعر القدير/ عادل عبدالرزاق...المحررة ياسمينةالكاشف/ تحياتي.
بقلم : عادل عبد الرازق
----------------------
قصيدة : لسه بحبك زي زمان
--------------------------

ولأني باحبك مش قادر
أقرب منك وانا خايف
أصل طريقك متشجر ضلمة
وانا في الضلمة باكون مش شايف
ولا عارف مين كسر قناديلك
ولا فاهم سرك ولا عارف
إيه خلاً الأشباح تسكن طرقاتك
وركنت قلبي على جدار البيت
بصيت على قنديل مكسور
تحتيه كان طفل بيبكي ومجروح
شباك مفتوح أخر بيت
بينادي البيت الأول لكن مش سامع
والعتمة بتتشجر عالجدران
كان الكون معبد فرعوني
كان الكون معبد زي عيونك
لحظة مالشمس اتعامدت على رمسيس
والورق البردي انكتبت فيه أشعارك
تراتيل المعبد كانت ليكي
وواديكي كان متحني بلون الورد
ومراكب شمسك بتغني في نيلها
لحظة مالفارس مات على شط الأحزان
بس باحبك …
لسه باحبك زي زمان
واكتر بزمان
في الشارع ده وقفت ف وش البيت
حنيت واتحنيت بوشوش الناس
ورسمت الحلم الفجر على الجدران
والضحكة راجعة لوشك أوطان
وانا لسه باحبك زي زمان
كونت حروفك قبل اللهجة الأولى
ورسمت القمراية أقدمها ليكي هدايا
شديت في خيوط الشمس المنفية
خليتها تنور حتى ف شق الجدران
وانا عاشقك وعشيقك
وراح احبك طول عمري
وانا لسه يا حبيبتي ..
لسه باحبك زي زمان