مجلة ~ قيثارة القلم الذهبى ~

((( خليك فى حالك )))
ياأبو العيوان بصاصه
تندب فيها رصاصه
ماتقولش عيوان قناصه
حسد وعشش فى راسه
فاكرها يابنى فراسه
عيوانه كاميرا بفلاشه
ماسك فى أيده كراسه
بيعد على الناس أنفاسها
ومابيحسبش أوجاعها
ردار وباين على الشاشه
بيتابع أخبارهم بحداقه
موجود وجاهز ولياقه
كلامنجى ولسانه طلقه
أسمع منى الخلاصه
ياأبو ودان نفاسه
لو واكل وبطنك شبعانه
وجيوبك تقيله وعمرانه
ورزقك موجود مال وعيال
ومرتاح وخالى البال
وماعندكش مشاكل ولاأشغال
وصحتك حلوه وعال العال
ماتبصش وتحسد غيرك
وتتصنت وتحشر منخيرك
وبلاش شغل الملامه والدنونه
وقلل من الكلام وورينا الأفعال
وساعد المحتاج والغلبان
الخير مش محتاج أستئذان
وسيبك من العك واللك
والشماته والنقوره
والبص على الناس يمين وشمال
تعيش حياتك فى سعاده
وماتقولش دا حاله تمام
ياأخى دوام الحال من المحال
بكره تجور الأيام
لما تقول الحمد الله
النعمه والصحه تدوم
وتعيش فى فرح وهنا
وتزول الهموم لوكانت مثل الجبال
كلمات/محمودصلاح السيد26/4/2017