** .. مفيش فى جيبه قروش .. ** // بقلم الشاعر/صبرى أبوطالب // مجلة ~ فيتارة القلم الذهبي

...مفيش فى جيبه قروش... 

من كلماتى انشاء الله تعجبكم
----------------------------
مفيش فى جيبه قروش...لكن دايماً بشوش
حامد ربه وتمللى...حافظ فرضه ومصلى
وأسأله دايماً يقولى...الرك على النفوس

أدبه فى فعله وكلامه...غالى وعالى فى مقامه
م اللى عارفه احترامه...واللى ميعرفوش
لا العيبة منه تطلع...ولا كلمة لغيره توجع
الدمعة فى عينه تلمع...على شىء ميعجبوش
أبيض قلبه ودافى...وتملى ضميره صاحى
لا لعب الشر بيه...ولا غما فى يوم عنيه
وتملى اللى عليه...بحساب قبل اللى ليه
أصله بميزان ساقيه...الخير من نبع صافى
عِزة نفسه وكرامته...دايماً فوق فى العلالى
ولا عمره مد ايده...ولا قال لحرام حلالى
بلقمة يسد جوعه...وحصيرته تلم نومته
قلبه لله فى طُوعه...ربانى النور فى وشه
زارع حُب البلد دى...فى قلوب أهله وولاده
وبايدها الحب تجنى...قلوب ولاد ولاده
أصله عاشق ترابها...ولا عمره حب غيرها
واللى يوفى لحبيبته...ميشوفش بعينه غيرها
رغم البخت العسير...رغم الحظ القليل
لا عمره فى يوم خدعها...ولا مرة خان وباعها
حتى فى ساعة وداعها...حافظ ليها الجميل
بقلم الشاعر/صبرى أبوطالب