♥ بحلم ♥ للشاعر/ مدحت عطية مجلة فيتارة القلم الذهبى

         ♥  بحلم   ♥     
   للشاعر/ مدحت عطية   

بحلم بالحب .. طريق
يمشيه .. كل الناس
بحلم يكون .. لى صديق
فى همومى .. وناس

بحلم بأيد .. في أيد
وعيون لقدام
بحلم بيا .. وبيك
مع بعض .. في سلام
بحلم بلحظه نفهم
ومانحتاجش لكلام
بحلم بالشمس .. بليل
بقمراية في النهار
بحلم نمد النيل
لكل العمار
بحلم تصير الصحارى
نخلاية .. ودار
بحلم ماشوفش دموع
ولاخدود مندية
بحلم نشد قلوع
الحزن من فوق الميه
بحلم بناس .. غير الناس
بحلم يازمان .. بزمان
بدمعه واحدة
بضحكة .. تضمنا
بحلم يموت .. الظلم
تتوه الحرب
يتوه البعد
يعيش .. القرب
بحلم .. وبحلم .. وبحلم
أصل الحقيقة حلم
كان يجرى في الخيال
مع الأيام يتلم
ويركب الحصان خيال
يبقى لازم الحلم
ولازم يكون البال

  مدحت عطية